VANTAGEM NO DEZVANTAGEM HARI KOOPERATIVA

CES ALVES XIMENES

IMPORTANCIA RAI BA COOPERATIVA MICRO E PEQUENAS EMPRESAS

I

NTRODUSAUN Rai nudar fator importante no fator determinante ba ser humana hodi bele moris iha rai pedasuk ida nia leten atu bele halo buat hotu-hotu tuir kbit nebe nia iha  hodi goza vida nudar ema humana atu dezenvolve nia ekonomia liu husi atividades Fila liman. Uluk iha resistensia nia laran ita Timor oan luta defende ita nia rain, tamba ne’e timor oan rasik kumpri tiha ona deveres nebe halo  durante kolonializasaun Portugues to’o mai iha Kolonializasaun Indonesia nian,  tamba rai pedasuk hat nebe ita hanaran a metade da ilha de Timor, a ilha de atauro a ilhota de Jaco nomos o Enclave de Oecusse. Timor oan rasik tenki hadomi rai doben TIMOR nudar parte integrante husi ita an rasik, tamba asuwain barak maka mate tan deit  rai Doben Timor-Leste ga Timor Lorosa’e. povo timor leste ne’e povo Heroico tamba konsegue liberta Rai doben Timor-leste liu husi Funu ida nebe Naruk, kleur no fakar ran. Sosiedade Timor oan labele faan rai ba ema estrangeiros hodi fila liman, tamba ita faan rai nebe halo parte ba ita nia kusta maka heroi sira nebe mate ona mos sei tanis tamba povo heroi ida faan ona rai pedasuk ida ba ema oportunista sira hodi fila liman iha rai nia leten, bainhira povo Timor Leste laiha konsensia maka iha loron ida ba loron ida Timor Puru sei sai mainatu ga pembantu ba ema estrageiros sira tamba sira mak iha osan no komprende saida mak Bisnis ga fila liman, tempu to’o ona timor oan rasik atu ukun nia an rasik no livre husi kiak no mukit, maske timor foin maka ukun an iha tinan sanolu resin tamba ne’e, ita tenki fila liman liu husi Cooperativa Micro e Pequenas empresas, hodi haforsa ekonomia uma kain nia ou palavra seluk dehan ekonomi familiar. Wainhira ekonmia umakain nian forte maka automatikamente kontribuisaun familia ba nasaun forte liu, liu husi indukasaun familia iha kampu de edukasaun hodi haruka oan sira ba eskola hodi foti mastrdu ou doutoramentu iha rai estrangeiros ou rai laran hodi servi rai doben Timor Leste liu husi edukasaun Formal, naun formal i Informal i Organijadu.

T

amba sa mak Cooperativa tenki iha Rai ?.

Cooperativa nudar empreza Timor Oan nian  tenki iha rai, hodi nune bele halo Cede ga Kantor no aktividades iha rai nia leten, nune mos ita Timor oan tenki iha rai pedasuk ruma. Rai ne laos rai seluk,  rai ida nebe ita mate hakoi iha rai leten, kuda Ai Horis tenki iha rai leten, buat hotu-hotu tenki iha rai leten. Tamba ita iha Timor ne seidauk iha lei ida atu hateten katak ita mate soe ba tasi ou sunu deit. Tamba ne’eduni ita tenki iha rai, Cooperativa tenki hanoin katak rai ne importate tamba hodi rai bele sai dokumentu juridiku ou badan Hukum hodi ba banku bele garante  hodi foti fundus ruma ga  Modal Investasi kuandu iha rai, Banku mos bele fiar ita hodi suporta modal investasi ne’e, atu nune Cooperativa nia bisnis aumenta sai bot. alien de Cooperativa Micro Empresa sira mos tenki iha rai, hodi nune’e bele garante sutentabilidade negosiu nebe iha, bainhira Micro Empresa mak laiha rai ida ne’e ameasas bot ba ita nia negosiu,  dala ruma aluga ou freta rai hodi halo bisnis ida ne’e lalos ona tamba rendimentu nebe iha sei sai hotu fali ba selu rai aluguer nian.

Cooperativas iha Timor Leste agora dadaun ne’e balun  mak iha ona rai rasik nebe ho luan hectares 10 ba leten  mak hanesan Cooperativa Roman Furak Fatumaka iha Hektares 10, Cooperativa Tokodede Liquiça iha hectares 16, Cooperativa  Hosso Queli Anan iha rai Hektares 10,  Cooperativa hirak ne’e iha tinan  2013 Vice-Ministro do Comercio Industria e Ambiente Sr. Abel  Ximenes Larisina ba halo ona Lansamento Kuda Ai Mahoni ho ai Teka nomos koileta Fore Rai Cooperativa nian iha Rai Cooperativa Refere.

D

EFENISAUN KONA BA RAI,  katak Rai mak baze moris ba sosiedade ser humanu iha mundu.  Koalia konába rai ne’e desde avo sira nia tempu laos buat foun ba ser humanu iha mundu. Kriasaun hotu no sosiedade humanu halao sira nia moris iha rai, uza rai hanesan hela fatin, halimar fatin, negosiu fatin no ba dezenvolvimentu hodi sustenta moris individu, komunidade no nasaun. Laos ne’e deit maibe rai mos importante hodi halot ema nia isin mate bainhira distinu to’o. Tuir Matenek nain ida naran, Sayful Azam, SH iha nia livru ho titulu “ Eksistensi Hukum Tanah Dalam Mewujudkan Tertib Hukum Agraria,   hateten katak rai hanesan fatin ba ema hodi hela, rai mak fo haan ba ita, rai hanesan fatin atu halot ema nia isin mate” . Nune mos tuir komunidade Timor oan sira nia hanoin konába rai, “rai mak fatin ba moris, rai mak fatin ba Povu Agricultores sira, rai fo hahan ba ita, rai mak hakiak animal, rai mak fatin ida atu hetan be,  i nomos seluk tan nebe ita latemi.

Rai  iha Timor -Leste dala barak sensitivu tebes. Sentimentu kona ba kompleksidade no sensitividades problema rai nian sai hanesan prekupasaun ema barak nian. Prekupasaun ida ne’e laos mai husi Timor oan deit maibe dala barak mos sai prekupasaun ema barak nian, estadu Timor - este rasik ho Igreiza Katolika mos prekupa kona ba asuntu ne’e. Prekupasaun hirak ne’e iha tan haksesuk malu kona ba rai potensial tebes atu hamosu konflitu iha komunidade kona ba Uma, Propriedade no Direitu ba Rai. katak hadau malu rai sai nudar dezafiu potensial ba estabilidade no dezenvolvimentu, Hare ba kompleksidade haksesuk malu nebe potensial tebes ba konflitu. Kona ba Rai iha dimensaun oi-oin; dimensaun politika, ekonomia no sosio cultural, problema rai nudar asuntu ida nebe Importante tebes ba ita nudar Komunidades Nasaun ida ne’e nian. Tamba sa fenomena ida ne’e akuntese ? nudar konsekuensia husi konflitu durante okupasaun Portugal no Indonezia nian iha Timor-Leste hodi hamosu konflitu entre populasaun. Konsekuensia husi konflitu refere mak ikus mai Portugal sira destera Timor Oan balun no hetan kastigu iha rai kolonia seluk iha Afrika. Ema barak lakon direitu ba rai iha tempu neba. Komplesksidade problema rai refere kontinua hamosu prekupasaun bo’ot. Hadau malu rai kontinua akuntese. tanba sistema rai seidauk klaru. Konfuzaun ne’e hamosu konflitu iha komunidade no provoka situasaun iha Aldeia ka suku laran laiha rekonsiliasaun ba prosesu hari dame. ita haksesuk malu kona ba rai sei fo kauza ida ke boot tebes hasoru prosesu dezenvolvimentu, Dala barak ema dehan ne’e hau nia rai maibe ita labele halo konfirmasaun lolos ba rai ne’e tan la iha informasaun official ruma atu hateten katak Rai ne’e ema ida ne’e nian. Dalaruma mos ema faan no sosa rai maibe laiha Dokumentu ruma atu haten katak rai ne’e ninian. Ita ema povu Maubere aintanan sei la faan rai ba se se deit.

Koalia kona-ba sistema administrasaun rai ne’e laos buat foun ida ba Timor Leste. Iha tempu beiala sira nian kedas iha Timor Leste ezisti tiha ona sistema administrasaun rai tradisional hodi regula direitu nai’n no asesu ba rai iha komunidade. Sistema administrasaun ne’e nia abut metin tebes no ezisti kleur husi jerasaun ba jerasaun to’o ohin loron. Maske nune ho tempu ne’ebe muda no tama ona iha era globalizasaun Timor Leste presiza adapta an ho sistema modern nia hodi estabelese direitu nai’n ba rai tuir lei haruka.  Hadau malu rai ohin loron afeta no sobu sosiedade nia relasaun hahu husi vijinus, fetosan humane, maun alin, knua no komunidade. Dalabarak barak mak kauza membru familia sira nian komete violensia hodi halo amesas ba malu, baku no oho malu. 

            Matenek nain ida husi America, nia hakerek iha Disionario politico Oxford  katak : aumenta Efisiensia Economika, expansaun kapasidade ekonomika nasional ho teknologia avansada hanesan kondisoens basikas ba desenvolvimento sustentavel, e Aumento ba Produto Nacional Bruto no media reseitas hanesan meios, la os hanesan finalidade. Iha kasus balu, aumenta (satisfasaun) ba  aspeto prosperiedade  social, engloba, atinge parte satisfasaun spiritual no cultural, dignidade pessoal no ba grupo, desenvolvimento define hanesan kondisoens hotu-hotu nebe nesessarias atu dignifika ser humano nia moris.  Definisaun simples, desenvolvimento atu aumenta satisfasaun ba necessidade basikas hanesan : ai-han, saude, edukasaun, uma, no seluk tan nebe hanesan nesesidade terceria. Lia desenvolvimento kostuma signifika,ba melhoramento ba indikadores social (fisiko) hanesan kualidade vida moris.

Sidadaun timor oan laiha Rai ne lalos, lalos tamba nudar timor oan sai fali hanesan turista iha nia rain laran rasik, ema estrangeiros mak iha fali rai ne lalos, se ita Timor Oan faan tiha rai ba ema estrngeiros maka Timor puru sira sei ba hela fali iha foho leten, hanesan uluk invazaun Indonesia sira mai invade  ita nia rain iha 1974 – 1999, tamba ne’e ita kuidadu kuandu derepente listrik lakan iha foho leten ne’e pasti ona ema Timor maka hela iha neba, laos ema estrangeiros sira. Rai doben timor Leste Libertodu ona ita tenki halo buat ruma iha rai nia leten liu husi serbisu Agricultura nomos aktividades ekonomika.  Rai principal sira kuandu ita faan hotu maka ita sei  hetan problema ba ita mak hanesan; Ezistencia produsaun komercial nebe la fo espasu ekonomia ba agrikultores sira tamba domina ho konstrusaun ou edifisiu bobot sira nebe okupa fatin. Se kuandu ita la konsidera rai hanesan asset importante maka ita sei labele hetan moris diak liu husi rai nebe ita iha.

L

EI RAI HO NIA DEFINISAUN. termus importante balun ligasaun ho definisaun legal no direitu ba rai ne’ebe Povo Maubere presiza hatene.  Legal ne’e katak autentika no halao tuir lei. Ezemplu Lei Agraria Lei ne’ebe iha ligasaun ho rai, pose rai, divizaun rai no riqueza rai . Timor Leste ohin loron iha esbosu lei rai ida. Nebe hateten katak, Lei rai ne’e nia objeitu (artigu 1.3) maka atu fo rekuiñesimentu no mos atribuisaun ba direitu ne’ebé primeiru ba rai nian iha prinsipiu orientasaun hanesan respeitu ba direitos anteriores primarios, rekuiñesimentu ba pose hanesan baze ba atribuisaun direitu ba na’in ba bens imoveis no mos kompensasaun ba kazu ne’ebé hasoru direitos liu husi ida. Lei rai nian fo oportunidade atu dezenvolve objetu lei rai nain hanesan tuir mai ne’e :  1. Lei ida ne’e estabelese rejime espesiál ba definisaun na’in ba bens imóveis liu husi rekoñesimentu no atribuisaun ba títulu ba na’in ba bens imóveis.  iha Repúblika Demokrátika Timor-Leste nian.  2. Rejime espesial ba definisaun na’in ba bens imóveis iha objektivo atu klarifika situasaun juridika ba bens imóveis iha Timor-Leste, promove distribuisaun rai nian ba cidadaun hotu-hotu no mos garante ba ema hotu-hotu acesso ba rai;  3. Rekoñesimentu no mos atribuisaun ba direito ne’ebe primeiro ba rai nian iha prinsipio orientasaun hanessan respeito ba direitos anteriores primários, rekoñesimento ba pose hanessan base ba atribuisaun direito ba na’in ba bens imóveis no mos compensasaun ba caso ne’ebe hasoru direitos liu husi ida; Adminsitrasaun rai: Iha estudu ida ne’ebe halao husi ARD, UNTL no Ministeriu Justisa (East Timor Land Law Program, 2005) konsidera katak “rai no propriedade nudar objeitu husi administrasaun rai. Estadu mak iha responsabilidade atu estabelese sistema administrasaun rai hodi garantia direitu nai’n ba rai tuir lei. Iha Timor Leste Dirasaun Nacional Terras e Propriedades no Servicos Cadastrais (DNTPSC) mak iha mandato atu administra rai no nai’n ba rai tuir lei. Bens Imóveis de Domíniu Privadu: Propriedade Dominiu Privadu ou Harta Benda milik Pribadi konsidera nudar bens imóveis ne’ebe iha domíniu privadu, iha area rurais no urbanos ne’ebe sai objeitu ba jurídiku no titular ba sidadaun nacional privadu, singulares, colectivas ou Estado

K

Onkuluzaun; Cooperativa tenki iha rai atu nune’e bele halo negosiu ou hari Cede Cooperativa nian iha rai refere atu nune’e bele hetan sustentabilidade no kontinuidade iha futuru hodi hadia ita nia moris liu husi Micro Negosiu,  iha Nasaun Timor Leste iha ona esbosu lei kona ba rai.  iha artigu 1.3, maka atu fo rekuiñesimentu no mos atribuisaun ba direitu ne’ebé primeiru ba rai nian iha prinsipiu orientasaun hanesan respeitu ba direitos anteriores primarios, rekuiñesimentu ba pose hanesan baze ba atribuisaun direitu ba na’in ba bens imoveis no mos kompensasaun ba kazu ne’ebé hasoru. ita Timor Oan laos ema kiak maibe, seidauk iha konhesimentu kona ba progresu globalizasaun nebe vigora iha ita nia rai laran  ligadu ho Negosiu. So deit rai maka ita bele moris iha leten, bele halo uma nomos buat seluk tan nebe agrikultores sira presiza.